Urtebete pasatu da N-121 errepidearen Bera eta Irun arteko zatia inauguratu zenetik, eta tarte horretan %12 igo da ibilgailuen joan-etorria. Hala, berriki argitaratu diren datuen arabera, egunean 10.800 ibilgailu pasatzen dira Endarlatsatik, eta horietatik %27 ibilgailu astunak dira.
Obrak egin aitzinetik, 2007an, egunean 9.700 ibilgailuk zeharkatzen zuten Bortziriak Gipuzkoarekin lotzen dituen errepide hau, beti ere, Gipuzkoako Foru Aldundiaren arabera. Baina obrak iraun zuten denboran, beheiti egin zuen: 7.200 ibilgailu pasatu ziren egunean.
Atzerapenekin ireki ziren bideak
Bi urtez obratan aritu ondotik, Beratik Irunerako zatia ekainaren 26an inauguratu zuten. Endarlatsatik Irunerako zati berriak 6,6 kilometro ditu eta 2,5 kilometro Endarlatsatik Bera artekoak. Sunbilla-Bera arteko zatia, aldiz, urriaren 23an zabaldu zuten. Azken 7,870 kilometro horiek falta ziren Sunbilla eta Behobia arteko errepidea osorik irekitzeko eta zazpi hilabeteko atzerapenarekin ireki zuten.