TTIPI-TTAPAren Hego Euskal Herriko eremuan dauden 25 udalerrietatik 17k 21.289.000 euroko zorrekin itxi zuten 2009a. Hala ondoriozta daiteke Espainiako Gobernuko Ekonomia eta Ogasun Ministerioak berriki argitaratu dituen datuetatik. Emandako zenbakiak banketxeetan dauden zorrak dira, kredituei dagozkienak, beraz.
Hainbat arrazoi egon daitezke udal bakoitzaren mailaren gibelean: finantzazio desegokia, edo azpiegituretan obra haundiak egin dituztelako... Zorrik ez dutenen kasuan, aldiz, inbertsiorik egin ez dutelako ere izan daiteke.
Zorrik haundiena, herri haundienetan
Txostenaren arabera, zor haundiena dutenak udalerririk haundienak dira. Baztan dago lehen postuan 8.311.000 euroko zorrarekin; ondotik Lesaka 4.904.000 eurorekin; hirugarren Leitza 2.305.000 euroko zorrarekin eta laugarren Bera 1.392.000 euroko zorpetze mailarekin.
Bertze udal batzuek, ordea, ez zuten euro bakar bateko zorrik joan den urte bukaeran. Eta horixe da Arano, Beintza-Labaien, Donamaria, Ezkurra, Goizueta, Saldias, Urroz eta Zubietaren kasua.
Gainerako udalak milioi bat euroko zorraren azpitik daude.
Zorpetze altuagoa
2008ko abenduaren 31n udalen zorpetze maila kontuan hartuz, 3.558.000 eurotan igo da. Zorrik gabe segitzen dutenak berdintsuak dira, eta bertzeen kasuan, batzuetan goiti eta bertzeetan beheiti egin du zorrak.
Bertzalde, Nafarroako datuak aintzat hartuz, Iruña (69.010.000 euro), Tutera (15.199.000 euro), Castejon (12.222.000 euro) eta Baztan dira zerendan lau lehendabizikoak. Horien ondotik, zerrendan 12.a da Lesaka, 26.a Leitza eta 43.a Bera.
HERRIA ZORRA 2009AN ZORRA 2008AN
ARANO 0 euro 0 euro
ARANTZA 459.000 euro 473.000 euro
ARESO 379.000 euro 387.000 euro
BAZTAN 8.311.000 euro 5.988.000 euro
BEINTZA-LABAIEN 0 euro 0 euro
BERA 1.392.000 euro 955.000 euro
BERTIZARANA 347.000 euro 273.000 euro
DONAMARIA 0 euro 0 euro
DONEZTEBE 419.000 euro 467.000 euro
ETXALAR 480.000 euro 329.000 euro
ELGORRIAGA 10.000 euro 0 euro
ERATSUN 64.000 euro 50.000 euro
EZKURRA 0 euro 0 euro
GOIZUETA 0 euro 0 euro
IGANTZI 521.000 euro 206.000 euro
ITUREN 241.000 euro 272.000 euro
LEITZA 2.305.000 euro 2.496.000 euro
LESAKA 4.904.000 euro 4.528.000 euro
OIZ 106.000 euro 112.000 euro
SALDIAS 0 euro 0 euro
SUNBILLA 54.000 euro 45.000 euro
URDAZUBI 602.000 euro 494.000 euro
URROZ 0 euro 48.000 euro
ZUBIETA 0 euro 0 euro
ZUGARRAMURDI 695.000 euro 608.000 euro
GUZTIRA 21.289.000 euro 17.731.000 euro
*Oharra: 2008 eta 2009ko abenduaren 31ko datuak dira.