Arlo publikoan deitutako grebak segida haundia izan du eskualdean

LAB, ELA, ESK eta STEE-EILAS sindikatuek maiatzaren 25erako arlo publikoan deitutako greba deialdiak arrakasta izan zuen eskualdean.
Bortzirietako udal zerbitzuak geldirik izan ziren, baita Doneztebekoak ere eta Baztanen %50 gelditu zen. Mankomunitateei dagokienez, Bortzirietako Oinarrizko Gizarte Zerbitzuen Mankomunitatean guttieneko zerbitzuak bete zituzten, atentzioa behar duten zaharrak artatzeko. Hiri-Hondakinen Mankomunitatea eta Malerreka eta Bortzirietako Euskara Mankomunitateak ere geldirik egon ziren. Leitzaldeko Udalak eta mankomunitateak ere geldirik egon ziren.
Ikastetxe publikoei dagokienez, Berako Ricardo Baroja ikastetxean langileen %50ak greba egin zuen eta bertze erdia lanean aritu zen, baina soldata gizarte zerbitzuei bideratzeko. Berako Toki-Ona Institutuan grebak %60ko jarraipena izan zuen, Etxalarko Landagain ikastetxe publikoan bezala. Lesakako Irain eskolan %70eko jarraipena izan zuen eta Arantza eta Igantziko eskoletan ere jarraipen haundia. Baztan eta Malerrekako eskoletan, banaz bertze %50-%60ko jarraipena izan zuen.
Grebarekin batera,  kontzentrazioa egin zen Berako Herriko Etxeko Plazan. Administrazioan murrizketarik ez! zioen pankartaren gibelean 30-40 bat lagun bildu ziren.