Fin ibili dira baztandarrak aurtengo Nafarroako Goma Gaineko Lauko Sokatira Txapelketan, jokoan ziren lau txapeletatik laurak eskuratu baitituzte. Igande honetan, maiatzaren 29an jokatu zen azken jardunaldia Jauntsarasen eta orduan banatu ziren sariak.
Gizonezkoetan, 320 kilokoen kategorian, Amaiur gelditu zen txapeldun eta Amaiurko bertze talde bat, Ttuku-Ttuku, bigarren. Txantrea, Imotz eta Basaburua gelditu ziren ondotik.
Emakumeetan, 255 kilokoen mailan, azken saio horretara puntutan berdinduak ailegatu ziren Amaiur eta Lesakako Beti Gazte, aitzineko bi jardunaldietan, bertze talde guzien kontrako tiraldiak irabazi eta elkarren artean parra eginez. Baina Jauntsarasen Amaiur atera zen garaile lesakarren kontrako bi tiraldiak irabazita. Gainera, Beti Gaztek Sakanaren kontrako tiraldi bat ere galdu zuen. Halere, Lesakako taldea bigarren gelditu zen sailkapen orokorrean. Sakana, Berriozar eta Basaburua-Imotzek osatu zuten sailkapena.
21 urte artekoetan, 320 kilokoan, Baztango Basaburua atera zen txapeldun, eta Amaiurko taldea hirugarren gelditu zen. Txantreako taldea, berriz, bigarrena izan zen.
Kadeteen kategorian ere Baztango Basaburua izan zen jaun eta jabe. Azkeneko jardunaldian berdinketa egin zuen Etxarri Aranatzeko Andra Marirekin, baina ordurako txapela erabakia zegoen. Andra Mari sailkapenean bigarren izan zen, eta Txantrea hirugarren.