LAB, ELA eta STEE-EILAS sindikatuek arlo publikoan deitutako greba deialdiak arrakasta izan du maiatzaren 25ean.
Bortzirietako udal zerbitzuak geldirik izan dira, baita Doneztebekoak ere eta Baztanen %50 gelditu da.
Mankomunitateei dagokienez, Bortzirietako Oinarrizko Gizarte Zerbitzuen Mankomunitatean guttieneko zerbitzuak bete dituzte, atentzioa behar duten zaharrak artatzeko. Hiri-Hondakinen Mankomunitatea eta Malerreka eta Bortzirietako Euskara Mankomunitateak ere geldirik egon dira.
Leitzaldeko Udalak ere geldirik egon dira, baita mankomunitateak ere.
Ikastetxe publikoei dagokienez, Berajo Ricardo Baroja ikastetxean langileen %50ak greba egin du eta bertze erdia lanean aritu da, baina soladata gizarte zerbitzuei bideratzeko. Berako Toki-Ona institutuan grebak %60ko jarraipena izan du, Etxalarko Landagain ikastetxe publikoan bezalaxe. Lesakako Irain eskolan %70eko jarraipena izan du eta Arantza eta Igantziko eskoletan %100ekoa. Baztan eta Malerrekako eskoletan, banaz bertze %50-%60ko jarraipena izan du grebak.
Grebarekin batera, ordu erdiko kontzentrazioa ere egin da Berako Herriko Etxeko Plazan. “Administrazioan murrizketarik ez!” zioen pankartaren gibelean 50 bat lagun bildu dira.