Duela bi urte Nafarroako Gobernuak Euskarabidea sortu izanak, itxaropena piztu zion bati baino gehiagori, baina praktikan, agerikoa da Gobernuak euskararen aurka daraman politika. Horren aitzinean, Nafarroako euskalgintzako eragileek bat egin eta manifestaziorako deia egin dute larunbat honetarako, hilak 15, Iruñean. Ekimen honi atxikimendua adierazteko aukera ere badago www.blogak.com/maiatzak15-en. Topaguneko arduraduna den Oskar Zapata deialdia egin dutenen artean dago eta berak eman dizkigu xehetasunak.
Apirilaren 19an Egunkaria auziko sententzia jakin genuen. Sententzia horrek euskalgintza osoa absolbitzen al du?
Epaiaren pasarteren bat lasaigarria da euskaldun guztiontzako. Izan ere, epaiketa hau nagusiki adierazpen askatasunaren kontrako eraso larri bat izan da, baina zuzenean bestelako eraginak ditu: euskaldunok euskaraz informatzeko genuen tresna garrantzitsu bat desagertarazi dute, pertsona batzuk susmopean izan dituzte hainbat urtez eta beraiekin batera, euskalgintza guztia susmopean jartzera heldu denik ere bada. Orain absolbitu dituzte, baina kaltea eginda dago eta hori konpontzerik ez dagoen arren, kalteordainak kitatzeko eskatu behar zaie arduradunei.
Nafarroako Gobernua euskaldunon kontra ari dela salatu duzue...
Kontra ari da, euskararen sustapena babestu eta lagundu beharrean, oztopoak baino ez dituelako jartzen: legalak, politikoak eta ekonomikoak. Lau adibide: Gobernuaren ildoko hedabideetan egungo euskaldunak ez gara existitzen, ez bada gauza folkloriko edo arkaikoekin lotuta. Gobernuak ez du aukerarik eskaintzen sare publikoan haurrak eta gazteak euskaraz matrikulatzeko. Iaz, hedabideentzako dirulaguntzarik ez zen egon. Aurten aisialdi-kultur-sentsibilizazio arloak sustatzeko 32.000 euroko aurrekontua du guztien artean banatzeko: iraingarria, ezta?
Nola eragiten die horrek Nafarroako euskaldunei?
Euskubide murrizketa garbia pairatzen dugu. Administrazioarekin euskaraz ezin gara komunikatu. Euskararen sustapena kontzienteki baldintzatzen dute txarrerako: haur, gazte edo helduentzako kultur-aisialdi proiektuak ez dira finantzatzen. Eraikita duguna, dela hedabide bat, dela euskaltegi bat, dela mintzapraktika... ekonomikoki ito ez dezaten ahaleginak egin behar ditugu. Zertarako egiten dute? Nekea, etsipena, tristura, amorrua... eragiteko.
Zein da manifestazioaren helburua?
Gobernuari esatea: aski da! Gainerako alderdi politikoei: eskubideak ditugu eta horiek errespeta daitezen lan egin ezazue. Gizarteari: gero eta euskaltzale nafar gehiago gara, gurekin kontatu behar da Nafarroa anitzagoa eta demokratikoagoa eraiki nahi bada, atera zaitezte kalera, erakuts ezazue euskara bizirik nahi duzuela, babestu Nafarroako euskalgintza.
Nafarroan euskaraz bizitzeko eskubidea da leloa. Zertan gauzatu behar da eskubide hori?
Zertan gauzatzen dira gaztelaniadunenak? Horietan berberetan. Modu progresiboan bermatzen joan behar direla? Ados. Eskubide berdintasuna besterik ez dugu eskatzen. Horretarako gaztelaniak duen estatus ofiziala euskarari ere aitortu behar zaio. Pertsonen eskubideez ari gara, politikaren aurretik dauden eskubideez. Pertsonak gara betebeharrak eta eskubideak ditugunak, pertsonak gara diskriminazioa jasotzen dugunak. Nafarrak gara betebehar berdinak izanik, euskaraz egiteko hainbatetan eskubidea ez dugunak. Hori diskriminazioa da, lege gaizto batek areagotzen duena. Eta Gobernuak modu ankerrean erabiltzen duena.
Zer lortu nahi da zehazki Gobernutik?
Ez dutela egin nahi badakigu, baina errekonozimendua eta laguntza, hori da Nafarroako Gobernuak zor diguna.