Bistakoa da eskola berria behar dela, eta horixe adierazi zieten eskolakoek Nafarroako parlamentariei apirilaren 30ean, eskolan izan baitziren bisitan. Banatuak dauden ikasgelak ordezkatzearen beharra azpimarratu zieten. Izan ere, ingeleseko klaseetara joateko errepidea gurutzatu behar izaten dute neska-mutikoek, eta gimnasio gisa Ganbara erabiltzen dute. Tximiniaren arazoa ere aipatu zieten, bizpahiru aldiz su hartu duelako eta horren ondorioz, ikasleak eskolara sartu ezinik gelditu izan dira.
Eskola berria ikasturte honetarako egitekoa zen, Udalak duen 2.100 metro koadroko eremuan, baina badirudi krisiak atzeratu duela obra. Gainera, hurrengo urtean ikasle gehiago izanen dira –orain 49 dira, eta heldu den ikasturtean 54 espero dira–, eta beraz, beharra haundiagoa izanen da.