Nafarroako launakako sokatira txapelketaren bigarren jardunaldia jokatu zen larunbatean Zugarramurdin.
Gizonezkoen txapelketan, 320 kilotan, Amaiur taldea nagusitu zen, tiraldi guziak irabazita. Herri bereko Ttuku-Ttuku taldea izan zen bigarren, Amaiurren kontrako tiraldiak izan ezik, gainerako guziak irabazita. Txantrea izan zen hirugarren, Basaburua laugarren eta Imotz bosgarren.
Emakumezkoen txapelketan, 255 kilotan, lehen jardunaldian bezalaxe, lehen postuan berdindu egin zuten Amaiur eta Lesakako Beti Gaztek. Bertze taldeen kontrako tiraldi guziak eta elkarren artean tiraldi bana irabazi zuten. Sakana izan zen hirugarren, Berriozar laugarren eta Basaburua-Imotz bosgarren.
Gazteetan Basaburua nagusi
21 urte artekoen txapelketan, 320 kilotan, Basaburua nagusiru zen tiraldi guzietan. Txantrea eta Amaiurrek, berriz, Basaburuaren kontra galdu eta elkarren arteko tiraldi bana irabazi zuten.
Kadete mailakoen txapelketan ere, 295 kilotan, Baztango Basaburua nagusitu zitzaion Txantreari. Etxarri Aranazko Andra Mari taldeak ezin izan zuen bigarren jardunaldian parte hartu.
Txapelketa honetako hirugarren eta hondar jardunaldia maiatzaren 29an jokatuko da, Jauntsarasko frontoian.