Julio Sotok jantzi du txapela, buruz burukoaren beharrik gabe

Bildu izan da aurtengoan Nafarroako Ber­tsozale Elkarteak Nafa­rroako 39. Txapel­ketara­ko hautatutako leloa eta martxoaren 20ko finalean gauza ugari bildu zituen bertsolaritzak. Hasteko, 1.200 ikusle bildu zi­ren Lesakako pilotalekuan. Izan ere, Elizondoko Lur dantzalekua ttiki geldituta, lekuz aldatu da aurten, baina Internetez nahiz saltoki guzietako sarrerak astebete lehenago agortuak zirela kontuan hartuz, bertze lekuren baten bila ere hasi beharko da.

24 puntuko aldea
Urteetan bertso esko­letan egindako lanaren uzta bildu zuena Julio Soto izan zen. Hiru urtez eskolartekoan txapeldun izan zen ttikitan, Silveirarekin buruz buruko gogoanga­rri baten ondotik az­pitxa­peldun izan zen iaz Gorritikoa, eta Euskal Herriko txapelketako finalerdietan ere sartu zuen burua. Aurten ez dio Nafarroako txapelari aldegiten utzi eta berekin bildu du, saio dotorea egin ondotik. Ez zen desenpatearen beharrik izan: 20 puntu edo gu­ttiagoren aldea dagoenean joka­tzen da buruz burukoa, eta Arkaitz Goikoetxeari 24 puntuko aldea atera zion. Lekunberrin bizi den oiar­tzua­rra­rentzat Nafa­rroako lehen txapelketa zen, nahiz eta Gipuzkoa eta Euskal He­rri­koetan esperientzia izan.
Podiumeko hiruga­rren koxka Estitxu Aro­ze­narentzat izan zen. Hiru urte txapelketatik kan­po egon ondotik ederki aritu zen lesaka­rra, finaleko emakume bakarra. Doi-doi, puntu erdiagatik sailkapenean aurre hartu zion Oskar Estangari Xabier Legarretak. Aranokoak saio erregularra egin zuen, aka­tsik gabea eta arrazoiez ongi hornitua. Seguruenik jarraitzaile gehien bildu zuena, eta dudarik gabe, animorik gehien bildu zuena Eneko Lazkoz izan zen. Lehen finala zen Etxa­rri­koa­rentzat eta maila eman zuen hasieratik bukaeraraino. Sailkapena ixten, Xabier Terreros lesakarra eta, karre­rilla hartuta etorria zen Julen Zelaieta berata­rra izan ziren.
 
Txapela euskal baserritarrarentzat
Julio Sotok euskal baserritarrei eskaini zien bere lehenbiziko txapela, euskara eta ber­tsolaritzari eutsi diotelako: maite nautenen baimenarekin/ nire txapela berari/ garapenaren aroan sarri/ mespretxatu izan denari/ euskal kultura benetan zer den/ erakutsi didanari/ bertsolaritza eguneroko/ jaki izan duenari/ euskal base­rritarrari.