Aurten ere itzal handiko pertsonak omenduko ditu Sarako Idazleen Biltzarrak. Haietariko bat Eñaut Etxamendi izanen da, eta bestea, Alexandre de La Cerda. Etxamendi kantugintzan ezaguna da batez ere, baina literaturan ekarpen zabala egin du, hainbat artikulu, gogoeta, ipuin eta eleberri paperera ekarriz. De la Cerda ez da hain ezaguna, baina jadanik lan adierazgarria egin du Lapurdiri buruz, besteak beste, Entre Nive et Nivelle liburua argitaratuz.
27.a da aurtengo Bazko astelehenean ateak irekiko dituen Idazleen Biltzarra. Goizeko hamarretatik aitzinera iaztik argitaratu diren ehunka berrikuntza ezagutzeko aukera emanen du. Usaia den bezala, haien idazleekin ere hitz egiteko aukera izanen du bisitariak. 70 bat idazlek konfirmatu dute jadanik gure herrian izanen direla apirilaren 5ean.
Urtero bezala, Euskal Herriari buruz lan bat egiten ari diren lagunei hamar beka banatuko dizkie Eusko Ikaskuntzak. Eta horren ondoan margo eta argazki erakustetaz gozatzeko aukera izanen da. Egun osoan bederatzi libururen aurkezpena eginen dira, besteak beste, Auxtin Zamoraren Sara etxez etxe liburuarena, Eneko Bidegainen Gerla Handia, muga sakona liburuarena eta Henri Duhauren Lapurdiko ihauteria eta mutxikoen pizkundea liburuarena.
70 bat idazlek biltzarrean egonen direla baieztatu dute
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.
Egin TTIPI-TTAPAren lagun