Herriko Etxeak eta Euskal Herriko Laborantza Ganbara elkarteak irabazi dute Philippe Rey Pirineo Atlantikoetako prefetak beren kontra zabaldua zuen auzia. Afera da prefetak ez zuela batere begi onez ikusten berriki herriak EHLG elkarteari bi mila euroko laguntza eman izana. Gure hautetsi gehienen erabakia kentzea nahi zuen prefetak eta auzitegirat eraman zuen afera.
Ez da lehen aldia Frantziako ordezkariak urratsak egiten dituela EHLGren bidea trabatzeko. Azkenean, justiziak arrazoina eman dio herriari. Laguntza ez da kendu beharko eta, gainerat, prefetak mila euro ordaindu beharko dizkio herriari justizia gastuak estaltzeko.
Jean René Etxegarai abokata pozik da epaiarekin, horrek erran nahi baitu orain edozoin herrik laguntzen ahal duela EHLG elkartea. Bere ustez, afera politikoa da jazarpena bertzerik ez egiteko ELHGri. Etxegarairen erranetan, diru laguntza zilegia eta ona zen elkarte hori lanean ari baita Senperen, bertzeak bertze, zortzi laborari biltzen dituen kooperatiba bat sorrarazteko. Dominique Idiart axuantak gogoratu du ELHG elkartea Senperen ari dela lanean eta diru laguntza interes orokorraren alde zela.