Aurtengo inoteak mozorro samarrak

Aurten, justu-justuan egin dira inoteak; beha­rrik bizpahiru gazte mugitu diren! Haurrek eginak zituzten berenak, baina urteroko puska bil­tzea ia-ia egin gabe gelditu da. Gainera, denek haserre akitu du­te: antola­tzen aritu direnek, bakar-baka­rrik aritu direlako; beste batzuek, gazte gu­txi bildu direlako puska biltzera; beste batzuek, ordua paratu eta berandu hasi direlako; beste batzuek, garizuman egin direlako... Denek ere gauza bera esaten akitu dute, ez doazela berriz ere inoteetan pa­rte hartzera. Ez etsia hartu!
Nolanahi den, ortziralarekin hasi ziren inoteak. Hamabost bat gaztek afaria egin zuten, eta, afalondoan, mus txapelketa. Kantari ere aritu ziren, eta goizeko laurak arte luzatu zen gaua.
Larunbatarekin, puskak biltzera joan ziren base­rrietara goizean; franko berandu joan ere, ager­­­­­tu ez zirenen esperoan egon zelako jendea; izan ere, musikariak ia-ia gehiago ziren gazteak baino, eta lotsa zen auto batean abiatzea Urruti­ña­ra. Hondarrean, hiru-lau auto ibili ziren etxal­de batetik bestera. Soinu txikia jotzen, be­rriz, Aurtiz­ko bi neska gaz­te: Oihana eta Bidane. Ho­riek inor baino lehe­na­­go agertu eta enpeinu handia paratu zuten; ezusteko polita eman zuten.
Urtero bezala eta hu­tsik egin gabe, Otxantrengo bordan hasi ziren buelta egiten. Ondotik, Mantxengo bordara eta Intxurera; handik Lotzabiango Kantinara; atarian hiru laguneko zortzikoa egin, eta Loprenera salda jatera. Eta Loprenetik herrira. Herriko buel­ta akitu, eta orduan isildu ziren aurtiz­ta­rrak. Tabernean zen afaria gero, eta horrera ere berandu samar joan ziren gazteak, han baitzi­ren denak mahaian jarri­ta esperoan. Afalondoan, Joxe Anjel aritu zen organo jo­tzen, eta, afariko ardoak lagunduta, dantzan eta kantuan joan zen gaua.
Aurten ere egin ditugu inoteak, eta egitea hu­tsa ez da gutxi Saldiasko herri ttikiarentzat.