Gobernuaren laguntzarik gabe baina euskarazko udalekuak egin nahi dituzte Beintza-Labaien eta Arantzako aterpeek

Azken hamar urteotan egin diren Euskarazko Udalekuak kanpainari segida eman nahi diete Arantzako Aterpea eta Beintza-Labaiengo Orbela aterpeek. Nafarroako Gobernuak ez du aurten udaleku hauetarako diru­lagun­tzarik aurrei­kusi, eta hortaz, bi aterpeok ahalegin berezia egin dute prezioa ahal den guttien igo­tzeko. Ekimena mar­txoaren 5ean aurkeztu zuten antolakuntza bidelagun izan duten Bertizko Turismo Par­tzuergoak eta bi aterpeotako arduradunek.
Neska-mutiko aunitz mugitzen dituen ekimena da udalekuena. Ho­rren seinale, joan den urtean Nafarroa osoko ia mila ikaslek parte hartu zuten. Orduan, Adminis­trazioaren laguntzarekin, prezioa 120 eurokoa izan zen. Aurten, be­rriz, subentziorik ez dagoenez, 180 eurotan finkatu dute prezioa. A eta D eredu­ko Lehen Hez­kun­tzako 8 eta 12 urte arteko eta DBH­ko 13 eta 16 urte artekoei bideratua dago kanpaina eta sei eguneko (5 gau) egonaldiak egiteko izanen litzateke. Ekainaren 21etik abuz­tua­­ren 28ra iraunen luke eta 900 la­gunen­tzako plazak daude.
Gobernuaren dirulaguntza zuzenik egon ez arren, proiektuaren arduradunak Hezkuntza Sai­larekin harremanetan daude, «10 urtez iraun eta Nafarroako gizartean sus­traitu den proiektu honek zeharkako dirulaguntza izan dezan».
Informazio gehiago: www.consorciobertiz.orgweb orrian, 948 59 23 23 telefonoan edo udalekuak@consorciobertiz.org-en.