2012rako eginen egonen da Endarlatsa eta Doneztebe arteko txirrindularietzako bidea

Endarlatsa eta Doneztebe artean txirrindulariendako bidea egoki­tzen aurten hasiko dira eta 2012rako akitua egotea espero da. Honelaxe jakinarazi zuen martxoaren 2an Bertizko Partzuergoko Izaskun Goñik, Nafarroako Gobernuak eta Partzuergoak eskualderako plan eragilea sinatu zutenean. Hain zuzen, horixe izanen da in­gu­ruan turismoa bul­tza­tzeko eginen diren eki­me­nen artean lehenbizikoa, Endarlatsa eta Doneztebe arteko bidea egokitzea, Euroveloren baitan, Baiona eta Iruña lotuko dituen bidearen barne.
Mugaz gaindiko proiek­tu honen bultza­tzai­leak Bertizko Partzuergoa eta Bidasoa Activa dira Hegoaldean eta Pirinio Atlantikoko Kon­tseilu Orokorra­ Iparraldean.
Endarlatsa-Donez­te­be zatiak 873.003 euro­ko aurrekontua izanen du: 796.664 euro inber­tsio gastuetarako eta 76.338 bertze ekimenetarako. Inbertsio gastuetatik %65, 517.832 euro, FEDERen funtsatik ordainduko da eta  %35, 278.832 euro, Nafarroako Gobernuak. Seinaleak, promozioa, webgunea edo komunikazio arloak hartzen dituzten bertze ekimenetara bideratuko diren 76.336 euroetatik %35 Bertizko Partzuergoak ordainduko ditu eta %65 FEDER­en funtsatik.
Ekitaldian, bertzalde, Martin Garde Partzuergoko presidenteak etorkizuneko asmoa Donez­tebetik Elizondora bidea egokitzea izanen litzatekeela adierazi zuen. Carlos Erce Turismo zuzendariak, berriz, Euroveloren trazatuak Doneztebetik Saldias al­d­e­ra jo­tzen duela argitu zuen, eta hortik Irur­tzu­­ne­ra, Pla­zao­la bidearekin bat egiteko, Iruña bitarte.
Juan Ramon Corpas Turismo eta Kultura kon­tseilariak, bere aldetik, eskualdeak turismo eskaintza zabala duela eta, alde horretatik lana egin behar dela azpimarratu zuen, ingurua turismoaren jomuga izan dadin Nafarroaren barrenean.