1989an erabaki zuen Nafarroako Gobernuak gure herriaren izen ofiziala Urrotz izanen zela. Baina berriki, Euskaltzaindiak Nafarroako herrien izendegia onetsi du, eta Andres Iñigo Ariztegi buru duen Onomastika batzordeak Euskarabideari eskatu dio gure herriaren izen ofiziala –orain arte Urrotz– aldatzeko behar diren tramiteak egin ditzala.
Proposamen hau Nafarroako herri-izenen bukaerako txistukaria eta toponimoen arautzea izeneko txostenean eta Nafarroako udal Izendegia izeneko 155. arauan oinarritzen da.
Euskaltzaindiaren araudi horretan ageri denez, «Malerrekako Oitz eta Urrotz toponimoen kasuan, bertako ahoskeraren arabera, Oiz eta Urroz izan behar dute». Alegia, solasterakoan bi herri hauetan horrela erabiltzen dugulako egin da aldaketa.
Udalak ere onartu du
2010ko ilbeltzaren 26an egin zen osoko bilkuran onartu zuen Udalak Euskarabideak egindako proposamena, eta beraz, hemendik aitzinera gure herriaren izen ofiziala Urroz izanen da.