Elurrarekin hasi ziren inauteriak, nahiz eta hau ez zen traba izan Ortzegun Gizen goizean haurrak etxez etxe eskean ibiltzeko. Arratsaldean, berriz, antzerkiak frontoian egin behar izan ziren, elurrak ez baitzuen utzi herrian kalejira egiten. Igandean, otsailak 14, kinto bazkariak egin ziren eta astelehenean, eguraldi ezin hobearekin eta animoak gainezka zituztela, gazteak baserriz-baserri eskean ibili ziren. 60 gazte inguru bildu ziren eta gosaldu ondotik, bi auzotara banatu ziren trikitilariekin. Asteartea izan zen egun nagusia. Inoiz baino karroza gehiago atera ziren eta denetik ikusi zen: futbolariak, ile-apaintzaileak, andaluziarrak, poliziak, baserritarrak, txinatarrak... Herriko itzuliaren ondotik, ostatuetan bazkaldu eta 18:30erako jendea frontoira hurbildu zen bertso-pilota ikustera. Honako protagonistek parte hartu zuten: gorriz, Beñat Babole eta Jabier Tolare, urdinez Xabi Armitx eta Xabier Leiza eta bertsotan Peñagarikano eta Irazu. Hagitz partida berdindua izan zen eta azkenean gorriek irabazi zuten. Partidaren ondotik, gazteek saskia zozketatu zuten baserrietan izandako harrera ona eskertzeko. Santsiñeneko borda izan zen saritua.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.
Egin TTIPI-TTAPAren lagun