Etorkizun duinaren alde manifestazioa eginen dute Zalaingo langileek Gasteizen

Condesa taldeko Zalain Transformados lantegiko Langileen Batzordea deituta, mobilizazioak egiten ari dira langileak, etorkizun duinaren alde eta 95 langile kalera­tzeko zuzendaritzak egin duen mehatxuaren kontra. Hala, bortz egunez lanuzteak iragarri dituzte eta horietako ba­tzuk egin dituzte dagoeneko. Otsai­laren 26an ba­tza­rra eta manifestazioa egin zituzten, Zalain­dik Berara. Asteazken ho­netan ere, hilak 3, lanauzteaz gain, ba­tzarra eta manifestazioa egitekoa zuten Lesakan.
Ortzegunean, hilak 4, Gasteizera joanen dira. Ama Zuriaren Plazan elkarretaratzea eginen dute 11:30ean eta manifestazioa ondotik. Lanuzteko hondarreko egunak martxoaren 16a eta 17a izanen dira.

‘Urteak mehatxupean’
Langileek salatu dutenez, «urteak daramazkigu mehatxupean. Zalain Transformados lantegia Condesa taldeak hartuz geroztik, 180 lanpostu galdu ditu, 480 langiletik egungo 300era pasatuz, eta gehiago kaleratzeko mehatxuak bere horretan darrai». Izan ere, kopurua aldatzen bada ere, beti langileak soberan daudela diote zuzendaritzatik: «2007an 136 sobera ziren, 2008an 118, 2009ko uztailean aurkeztu zigun txostenean 140, 2010­erako EREa aurkez­teko txoste­nean 105 ziren eta azkeneko bileran adierazitakoaren arabera 95». Dena den, Langileen Ba­tzordeko presidente Xabier Bujandak gogoratu duenez, «Zalaingo enpresak galerak izan ditu azkeneko bortz urteetan, beraz, ezin erran­ gaur egungo egoera krisiagatik dela. Krisiak berezko egoera kaxkarra areagotu bertzerik ez du egin. Horregatik, lantegiak etorkizuna duen ala ez zehaztea eska­tzen diogu enpresari». Langileen etorkizuna ez ezik, enpresarena ere arris­kuan izan daitekeela uste du Enpresa Ba­tzor­deak.

Produkzioa beheiti
Urteko produkzioa 111.000 tonatik oraingo 40.000 tonara jautsi dela ere salatu dute langileek, Condesak hartutako erabakien ondorioz. «Lehen hainbat motatako hodiak egiten genituen, baina produkzio gehiena bertze lekue­tara bideratu eta Zalainen autogintzarako hodi kalibratuarekin baka­rrik gelditu gara. Condesa osoan hodi hori egiten dugun baka­rrak gara, baina produkzioa ttikia da».
Zalaingo langileak erre­gulazioan egon ziren 2009ko maiatzaren 25­etik abenduaren 31ra, inolako osagarririk gabe eta orain baldintza beretan bertze ERE batean daude irai­laren 30a arte, «komitearekin adostu gabeko EREa». Langileen Ba­tzordeak zuzendari­tzak egiten duen «planti­llaren erabillpen gehiegiz­koa» kritikatu du eta Nafarroako Gobernuak Zalaindik aurkeztutako erre­gulazio txostenei «inolako zorroztasunik gabe» erantzun diela uste du, «inolako disimulu­rik gabe ugazabaren alde erabakiz eta Langileen Ba­tzordeak aurkeztutako kontratxostenak kontutan hartu gabe».