Doneztebeko Erreka elkarteak zortzigarren aldiz antolatutako eskuz binakako pilota txapelketaren finalak otsailaren 27an, larunbat goiz eta arratsaldez jokatuko dira. Aitzinetik, ortziral arratsaldeko 16:30ean, Errekako pilotarien arteko txapelketen finalak jokatuko dira.
Aurrebenjamin A mailako buruz burukoan Aitor Agesta eta Urko Oiartzabal izanen dira aurrez aurre eta aurrebenjamin B mailan Pello Sein eta Oier Rodriguez. Hirugarren mailako benjaminetan, David Mitxeo eta Eneko Maylin ariko dira buruz buru eta bigarren mailako benjaminetan Aimar Zestau eta Mikel Bango. Hortik aitzinerako finalak binaka jokatuko dira. Lehen mailako benjaminetan, Asier Arozena eta Unai Ibarra, Aimar Saldias eta Ioritz Zelaietaren kontra. Bigarren mailako alebinetan Julen Larretxea eta Julen Saldias, Julen Inda eta Beñat Lazkanoren kontra; bigarren mailako infantiletan Iker Mariezkurrena eta Javier Saldias, Aritz Fagoaga eta Javier Seinen kontra eta bigarren mailako jubeniletan, Mikel Maia eta Julen Altxu, Ibai Juanena eta Unai Mariezkurrenaren kontra.
Larunbatean, goiz-arratsaldez
Halere, hitzordu nagusia larunbatean izanen da. Goizeko 10.30ean hasita hiru partida jokatuko dira. Benjaminetan, Umore Onako (Goizueta) Aizkorbe eta Apezetxea, Biltokiko (Igantzi) Mitxeo eta Telletxearen kontra ariko dira. Alebinetan, Errekako Salaberria eta Oberenako Mariezkurrenak Titin III.eko Zaenz eta Ilunpeko Alberdi izanen dituzte kontrario eta infantiletan, Zugarraldeko (Burlata) Larunbe eta Sarasa, Biltokiko Telletxea eta Txapagaingo (Ordizia) Iribarriaren aurka ariko dira.
Gero, Santamaria jatetxean bazkaria izanen da 13:30ean. 120 bat lagun espero dira, horietatik 60 Erreka elkarteak gonbidatuak. Oraindik izena eman nahi duenak 948 450043 edo 617792401 telefonora deitu behar du.
Bazkalondoan final nagusiak
Arratsaldeko 16:30ean hasiko da finalen bigarren txanda. Kadetetan Aurrera Saiazeko Zelaia eta Elustondo, Titin III.ko Iturriaga eta Aurrera Saiazeko Labakaren kontra ariko dira. Jubeniletan, Ilunpeko (Azpeitia) Etxaniz eta Aizpuru Errekako Oronoz eta Txarutako Jauregiren aurka ariko dira. 22 urtez beheitikoetan, Aldabideko (Arbizu) bi bikote ariko dira aurrez-aurre: Joseba Ezkurdia-Lukin eta Mattin Ezkurdia-Araña. Beraz, bi anai ariko dira elkarren kontra. Maila nagusian, Irigoien-Iparragirre (Lesaka-Leitza) bikote beteranoa Renobales-Landiribarren (Aurrera Saiaz-Uharte) kontra ariko da. Renobalesentzat laugarren finala segidan da eta horrek zerbait erran nahi du. Gainera, gibelean atzelari ona izanen du lagun. Maila nagusiko irabazleek 800 euroko saria izanen dute eta azpitxapeldunek 700 eurokoa. 22 urtez beheitiko kategoriako finalistek afaria ordaindua izanen dute Santamaria jatetxean.
Finalen ondotik sariak banatuko dira eta Luis Martinek eskainitako bi urdaizpikoren zozketa eginen da.