Espainiako neguko triatloi txapelketan brontzezko domina eskuratu du Patxi Vilak

Txirrindularitza profesionalean berriz ere hasteko itxaropena badu Patxi Vila beratarrak  eta maiatzera bitarteko epea jarri dio bere buruari, talderen bat harrapatu eta han hasteko. Baina bitartean, ez du geldirik egoteko asmorik eta Triatloi Zurietan (korrika, bizikleta eta eskia) trebatzen ari da Barañaingo Saltoki Lagunak taldearekin. Ez nolanahi gainera. Ilbeltzaren 30ean, Reinos-Alto Campoo (Kantabria) 24. Triatloi Zuria irabazi zuen, 180 tria­tleten artean nagusituz.
Lasterka egin behar ziren lehenbiziko bederatzi kilometroetan ongi eutsi zuen Berakoak eta Antonio Blanco liderretik 20 segundora hartu zuen bizikleta. Horixe da, noski, Vilaren punturik indartsuena eta 24 kilometroko bizikleta ibilaldian lehen postuan ja­rri zen, Alto Campoo igoera gogorra tartean zela. Honela, bortz minutuko abantailarekin ailegatu zen Patxi Vila iraupen eskiko tartera. Hamar kilometro egin behar izan zituen eta ongi eutsi zion lehen postuari.
Ez da triatloi zurian denboraldi honetan izan duen lorpen bakarra, duela aste batzuk Anson (Huesca) jokatu zen Espainiako txapelketan bron­tzezko domina lortu bai­tzuen. Aitzinera begira, Aretteko Triatloian parte hartzeko asmoa du, beti ere, prestaketa zain­tzeko helburuarekin.