Dagoeneko urte batzuk pasatu dira etxalartarrek auzolanak egiten zituztenetik. Ohitura hau baserritar aunitzek ez dute oraindik galdu eta urtean behin edo gehiagotan euren baserrietako bideak eta kunetak garbitzen dituzte. Patxiku Irisarri alkateak erran digunez, hemendik aitzinera Udalaren nahia baserrikoez gain, herrikoek ere auzolanak egitea da.
Nork egin beharko ditu auzolanak?
Etxalarren bizi diren 18 urtetik 55 urte arteko herritarrek, erroldatuek eta zentsuan sartuta daudenek egin beharko dituzte auzolanak. Horretarako plan bat prestatuko du Udalak. Bi aukera izanen dituzte herritarrek: lehena norberak aukeratzea zein lan egin nahi duen eta Udalari hori eskatzea, urtea akabatu baino lehen egiteko. Bigarrena Udalak agintzen duen lekura joan eta errandakoa egitea.
Bide bazterrak eta mendi-lanak
Egin beharreko lanen artean, bide bazterrak eta kunetak garbitzea, kunetak zimentatzea eta pistaren batean zementua edo todouno botatzea daude, bertzeak bertze. Mendiari dagokionez, arbolak landatu eta kimatzea, itxidurak egitea, pistetan ur-errekak egitea eta mantentzea, lehengo bide zaharrak eta bidaxkak garbitzea eta bide eta errepide bazterretan atseden tokiak jartzea daude. Bertze lan batzuk ere aipatu ditu Irisarrik: iturriak berreskuratzea, errekako zubitxoak mantentzea, kisulabeak berreskuratzea eta harrizko paretak zutik mantentzea. Alkateak argi erran digu auzolana arautzen duen udal ordenantzak dionez, herritar bakoitza lau auzolan egitera behartua dagoela.
30 euroko isuna
Oraindik, ordea, Udalak ez du erabaki aurtengoan zenbat auzolan eginen dituen herritar bakoitzak. Lehen bezala, orain ere, auzolana egiten ez duenak diruz ordaindu beharko du 30 euro inguruko multa.