Malerrekako eskuz binakako zortzigarren txapelketan 22 urtez azpiko finalerdiak jokatu ziren asteazken arratsaldean Doneztebeko pilotalekuan. Bietan Arbizuko Aldabideko pilotariak suertatu ziren garaile eta otsailaren 27ko finalean aurrez aurre izanen dira. Kuriosidade bezala, ez bakarrik talde berekoak, etxe berekoak ere izanen dira aurrez aurre aitzineko koadroetan finalean, Joseba Ezkurdia eta Mattin Ezkurdia.
Lehenbiziko partidan, Aldabideko Joseba Ezkurdia eta Lukinek 22 eta 12 irabazi zieten Lazkaoko Eskudero eta Leundari eta bigarrenean, Mattin Ezkurdia eta Arañak 22 eta 14 irabazi zieten Azpeitiko Ilunpeko Otamendi eta Yeregiri.
Kadete mailako finalerdiak igandean Donezteben
Otsailaren 27ko finaletako protagonista guziak ezagutzeko, kadete mailako finalerdiak bakarrik jokatzea falta da. Otsailaren 14an, igande goizeko 11:00etan hasita jokatuko dira Doneztebeko pilotalekuan. Lehenbiziko partidan, Hernaniko Urkizu eta Murgiondo, Tolosako Aurrera Saiaz taldeko Zelaia eta Elustondoren kontra ariko dira eta bigarrenean, Oiartzungo Oiarpeko Sarasti eta Imaz, Titin III.eko Iturriaga eta Aurrera Saiazeko Labakaren kontra.