Oraindik inauterietarako aste bat falta den arren, prestatzen hasiak dira herritarrak. Urtero bezala, ortzegunarekin, 28an, hasiko dira, lehendabiziko puxka biltze eta afariarekin. Ortziralean atseden hartu ondotik, larunbat arratsean berriro ere afaria izanen da. Igande goizean berriz puxkak bildu eta bazkari eta afariak izanen dira elkarteetan.
Eta eskualdean garrantzitsuenak diren egunak astelehen eta astearteko mozorro eta joaldunen joan-etorriak izanen dira. Asteazkena lasaixeago joanen da eta denak elkarrekin bazkaldu ondotik etxez-etxe ibiliko dira.
Kontuen eguna
Otsailaren 6an, larunbata, Iturenen kontuen eguna izanen da, inauterietako azken eguna, hain zuzen. Urtero, bazkaria izaten da Herriko Etxeko ganbaran eta bazkal aitzinetik aizkora apustua eta bertsolariak izaten dira plazan.
Aurtitzen, berriz, egun horretan, zaharren afaria izaten da eta nahiz eta zaharren afaria deitu, gazte, heldu eta xahar, denak elkartzen dira. Eta biharamunean, igandean kontuen eguna izaten da. Goizean kontuak egin eta eguerdian bazkariarekin amaitzen dira inauteriak.
Badakizue, hurbildu nahi baduzue, gonbidatuak zaudete gure herriko ohitura polit hau ezagutzera.
Eskolan ere prestatzen
Eguberrietako oporren bueltan, hilaren 11n hasi ziren gaztetxoak eskolan burubelarri. Orain bi aste eskasetan, inauterietako ortziraleko egitaraua prestatuko dute. Izan ere, ortziral goizeko lehen orduak ikasten pasatu ondotik, errekreoa eta gero, ikasleak mozorroak prestatzen hasiko dira. Goiz bazkaldu, eta 14:00 aldera herriari itzulia emanen diote eta arratsaldean txokolada izanen dute.
Joaldun gazteek ere harro jotzen dituzte joareak egun honetan, eta nola ez, musika doinuak ere ezin falta, herriko trikitilari eta panderojoleei esker.