Zenbat ziento elkarrizketa egin ote ditu Aimar Olaizola pilotari goizuetarrak? Ba, horien artean lehenbizikoa TTIPI-TTAPAri eskaini zion 1991n. Hamabi urte bete berriak zituela dagoeneko 25 txapel jantziak zituela ageri zen elkarrizketan. Orduan ere egunero aritzen zen pilotan Aimar mutikoa, «edozein momentu aprobetxatzen dut hortarako, errekreoak, ilunabarrak, oporrak edo asteburuak». Bere adineko gehienek bezala Aimarrek bere idoloak bazituen: «Beloki ikaragarri gustatzen zait eta Eugi ere bai. Futbolzalea eta Osasunaren aldekoa naizenez Urban ere nire idoloetako bat da, eta nola ez, Joxe Mari Bakero».