Kultur Arteko Topaketa antolatu dute Malerrekako Mankomunitateko Gizarte Zerbitzuak eta Venezuela, Argentina, Brasil, Portugal, Errumania, Dominikar Errepublika, Nigeria eta Euskal Herriko herritarrek eta Malerrekako Gazte Asanbladak, Gazte Burrunbak eta Sunbillako Antrotokik. Inmigrazio Programaren barne, abenduaren 4an hasita gisa guztietako ekitaldiak izanen dira herrian eta herritik kanpo. Egun haundia, halere, abenduaren 12an izanen da.
Abenduaren 4tik 12ra Emakume etorkina bizilaguna erakusketa eginen da Turismo Bulegoan. SOS arrazakeriaren 17 paneleko erakusketak emakume etorkinen esperientziak biltzen ditu. Astez, 11:00etatik 13:00etara eta 15:00etatik 19:00etara egonen da zabalik. Besta egunetan, 10:00etatik 14:00etara eta 16:00etatik 20:00etara. Abenduaren 11n 15:00etatik 18:00etara, eta azken egunean, 11:00etatik 14:00etara.
Donamarian eta Legasan ere izanen dira ekitaldiak. Sos Arrazakeriako Agustin Unzurrunzagarekin solasaldia eta berendua eginen dira Donamariako Ostatuan –oraindik eguna zehaztu gabea–, eta abenduaren 10ean, Legasako frontoian bideo emanaldia, solasaldia eta berendua eginen dira, 18:30ean hasita.
Hitzordu nagusia abenduaren 12an
•10:30etik aitzinera:
-Doneztebeko txistulariak herrian barna.
-Eliza atarian munduko janariak eta bitxikeriak, Musu-truk denda (erabiltzen ez diren gauzak mahai gainean paratuko dira nahi duenak hartzeko. Materiala aitzinetik ekarri behar da Mankomunitatera), migratzaileen omenez agurra eta aurreskua herriko dantzariekin, esaldien irakurketa hainbat hizkuntzatan, musika...
•Ondotik bazkaria.
•17:00-18:00: ginkana
•19:00-21:00: antzerki eta musika emanaldia eskolan: eskolako 3. mailakoen bi antzerki; Alma Latina Ekuadorreko dantza taldea, Ascana elkartearekin kapoeira, euskal dantzak, Herri beltza rap taldea, bertso saioa...