Arrakasta izan du Seaskako Integrazio Batzordearen alde Gaztetxeak, Atxuri Urdin peñak eta Olhain ikastolak antolatu zuten futbol txapelketak. Hamar taldek parte hartu zuten, 60 bat jokalarik gutxi gorabehera. Azkaingo taldeak irabazi zuen, lehen mailako finalean Angelukoa menean hartuz. Bigarren mailako finalean, berriz, saratarren arteko derbia izan zen. Sarako Izarra errugbi taldeko ordezkariek Atxuri Urdin peñaren kontra aritu ziren, baita nagusitu ere. Aipatzekoa da, bi talde Xiberoatik etorri zirela. Antolatzaileen arabera, egun guzian lagun arteko giroa izan zen nagusi.
Egunkariaren alde
Eguerdiko atsedenaldian, parte-hartzaile gehienek elgarretaratzea egin zuten Euskaldunon Egunkariaren hetsiera salatzeko eta auzipetuei elkartasuna adierazteko.
Egunkaria duela sei urte hetsi zuten, baina heldu den asteetan hasiko da epaiketa Joan Mari Torrealdai, Xabier Oleada, Iñaki Uria, Txema Auzmendi eta Martxelo Otamendiren aurka. Akusatzaileek diote Euskaldunon Egunkaria ETAren tresna zela eta bost kazetari ohiei etakide izatea leporatzen diete. AVT eta Dignidad y Justicia elkarteak dira akusatzaile bakarrak prokuradoreak berak auzia artxibatzea galdetu baitu frogarik ez delakoan.