Senpere zeharka lezakeen abiada haundiko treinbide berriaren proiektuak kezka haundia sortu du gure auzoetan, bereziki Helbarrun aldean, auzo hori izan baitaiteke kaltetuena. Inguruetako herrietan jadanik egin den bezala, Senperen ere herritar talde bat sortzekotan da informazioa emateko eta proiektuari buru egiteko. Urriaren 30ean, 50 lagun bildu ziren Elkartetxean eta horietatik erdia bederen ez omen zen sekulan agertu orain arte egin diren gisa hortako bilkuretan. Herritar multzo horrek deliberatu du hemendik goiti hilabetean behin bilduko direla hilabeteko bigarren ortziral arratsean. Ez da dudarik ondoko bilkuretan aipagai ainitz izanen dutela proiektua ainitz aitzineratzen ahal baita hazil huntan. Hilabete erditsuan, Frantziako garraio ministroa bilduko omen da Lapurdiko hautetsiekin, eta hilabete hondarrean treinbidea nundik pasako den jakinen omen da. Urtarrilean, proiektuaren kontrako manifestaldia eginen da Hendaian eta martxoan ospatuko diren Akitaniako bozen karietarat erreferenduma iraganen da jakiteko senpertarrek zer dioten treinbide berriaz.