Hiru hamarkada bete dira Zirikolatz Senpereko euskal dantza taldea kultura sustatzen ari dela. 30 urtez ehunka senpertarrek parte hartu dute abentura hortan eta denek oroitzapen ezin hobeak atxiki dituzte. Duela 20 urte, gaur egun baino mutil gehiago ari zen dantzan... Eta urteen buruan ez dituzte urratsak ahantzi, ez horixe. Hogoita hamargarren urtemugan, ingurutxoa ederki eskaini zuten lehenagoko dantzariek.
Giro bikaina
Besta hoberenak prestatuak ez direnak omen dira. Giro ona, noiznahi eta uste ez den momentuan piztu daiteke. Hori gertatu zen Zirikolatz euskal dantza taldearen hogoita hamargarren urtemuga bestaren karietarat, gan den urriaren 25ean. Goizeko mezaren ondotik, lehenagoko eta gaur egungo dantzariak Inharrean bildu ziren elgarrekin bazkaltzeko. Aperitifa denboran, lehenagoko argazki erakusketa ikusteko parada izan zen. Zonbat bidai, zonbat ateraldi, zonbat ikusgarri, zonbat urte? Balio haundiko argazki horiek ongi erakusten dute zonbat lan eta plazer izan duten ehunka senpertarrek euskal dantzaren inguruan. Argi da lanean aritzea balio duela, zerbeit gelditzen baita beti: jakitatea eta adiskidetasuna. Urtemugako bazkari hondarrean, bat-batean lehenagoko dantzariak xutitu ziren eta dantzan hasi ziren duela hamabortz edo hogoi urte bezala. Entsegurik egin gabe, txistulariak betiko doinuak jo zituen: aurreskua, banako, txontxogilo, ingurutxo, makil ttiki... Eta urteak pasatu ez balira bezala, gizon eta emazte bilakatu diren/garen dantzari ohiak dantzan hasi ziren/ginen. Batere prestatua ez zen bat-bateko momentu hori nekez ahantziko dute/dugu Senpereko gazteek eta dantza taldeko arduradunek. Euskal dantzan aritzea bizikletan ibiltzea bezala da doike, ez da sekulan ahanzten. Noizko dantzari ohien talde berria?
Lehengo eta oraingo dantzariak elgartu dira
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.
Egin TTIPI-TTAPAren lagun