Baztan, Bortziriak eta Malerrekan mendekotasuna duten pertsonei zuzendutako arreta zerbitzua izeneko enplegu-tailerra abian da.
Gure eskualdean egiten den bigarren tailer hau Cederna Garalur elkarteak sustatu du, Nafarroako Enplegu Zerbitzuaren eta Lesaka, Bera, Baztan eta Doneztebeko udalen finantziazioarekin, eta Europako Gizarte Funtsaren finantziazioarekin. UPD-Inafre erakundeak ere lagundu du.
Gobernuak 154.521 euro paratu ditu Enplegu Zerbitzuaren bitartez eta aipatu udalek 18.000 euro ordaindu dituzte denen artean. Urriaren 28an Lesakan egindako aurkezpenean zuten Lesakan eta Edurne Garro tailerraren zuzendariak «toki-entitateek lan-bazterkeria sufritzeko arriskuan dauden pertsonen kualifikazioa lantzeko ekintza honetan izan duten inplikazioa» nabarmendu zuen. Eskualdean 65 urtetik goitikoak %21 baino gehiago dira. «Hori dela eta, mendekotasuna duten pertsonen zainketarekin lotura duten zerbitzu gehiago eta kalitate handiagokoak behar dira zonaldean, batez ere emakumea lan-merkatuan txertatzen ari dela kontuan hartuta, izan ere, historikoki eurek hartu izan dute beren gain pertsona horien zainketa».
Tailerraren zuzendariarekin batera, Juan Fermin Mitxelena Lesakako alkatea, Esther Celaya Cederna-Garalur elkartearen zuzendari gerentea eta Jose Luis Ruiz Ciruelos Nafarroako Enplegu Zerbitzuaren zuzendari-gerentea izan dira, baita tailerrean ariko diren 15 ikasleak eta praktikak egiteko erabiliko dituzten egoitzetako eta zentroetako ordezkariak ere.
Enplegu-tailerrak
Enplegu tailerrak enplegua sortzen laguntzeko neurriak dira, eta 25 urtez goitiko langabeei zuzenduak dira; emakumeek eta prestakuntza guttiko etorkinek dute lehentasuna, baldin eta tailerrean ematen den espezializazioarekin lotura duen enpleguaren bila dabiltzanak badira.
Joan den urteko tailerrean parte hartu zutenen artean, %80ak baino gehiagok lortu zuen lanpostua ikastaroa bukatuta.