Kontent agertu dira Euskara Batzordeko antolatzaileak aurtengo Kultur Egunek izan duten martxarekin. «Jende aunitzek parte hartu du eta ekitaldiekin asmatu dugu», erran dute. Aurten hiru astez luzatu da kultur-zikloa.
Urri erdialdean haurrentzako pelikula eta Marimendi emakume taldearen aurkezpena izan ziren eta bietan jende bizkorki elkartu zen. Hurrengo astean txistu-kontzertu pedagogikoa eskaini zuen Irungo txistulari Bandak eta joan den urteko arrakasta errepikatu zuen. Ekitaldi guztien barrenean, Iruñeko Muthiko Alaiak fanfarreak eskaini zuen ikuskizuna izan zen jendearen interesa gehien piztu zuena. Emanaldi berezia izan zen, musika irudiarekin lotuz, euskal dantzak eta abesti herrikoiak nahastu zituena. Muxikoak, ezpata dantza, Euskal Herrian Euskaraz eta Baratze bat, denak elkartu zituzten ordu bat inguru iraun zuen emanaldi goxo eta berezian.
Azkeneko urteetako ohiturari segituz, bertso-afari eta desafioak itxi zituen Kultur Egunak. Lesakako hiru bertsolari, Iñigo Olaetxea Makuko, Joxe Juan Zubieta Etxabe eta Josu Sanjurjo Irungo bertze hiruren kontra aritu ziren. Estitxu Arozena izan zen gai-jartzailea eta bertsolariek haren ariketa bereziei erantzun behar izan zieten. Bertzeak bertze, jende ezagunen argazkiekin asmakizunetan aritu ziren eta Gran Hermano berezian sartu ziren bertsolari guztiak. Giroak eta umore onak ez zuen hutsik egin. Irune eta Itxaso Elizagoien trikitilariek ere parte hartu zuten. Publikoak erabakitakoaren arabera, Irungo bertsolariak izan ziren irabazle.
Pello Apezetxearen bi liburuak
Kultur Egunen barne egindako ekitaldien artean, herriko apezak emandako hitzaldia nabarmendu behar da. 40 lagunetik goiti elkartu ziren Kultur Etxean Pello Apezetxeak argitaratu dituen bi liburuen aurkezpenean. Hitzaldi interesgarri eta landua eskaini zuen Apezetxeak, irudi eta testuen laguntzaz. Jendearen arreta piztu zuen eta Kultur Etxea tanpetaraino bete zen.
Orain herriko bi dendetan paratu ditu salgai liburuak: Etxalarko etxeen izenak eta Etxalarren historiako zenbait jakingarri. Gure herriko ondare kultural eta historikoaren altxorrak dira.