Usategietako Igandean lehenbizikoz ez zen sarerik hedatu. Azken urteetan izan diren gorabeherak aurtengo sasoi hasieran lehertu ziren ehizturiek erabiltzen dituzten 4. eta 5. postuen aitzinean zuhaitzak moztuak agertu zirenean.
Usazaleek postu horiek kentzea eskatzen dute eta hori aldarrikatzeko, pankarta hedatu zuten Usategietako Igandean: Etxalarko Usategiak egoera larrian! Errespetua da konponbidea zioen. Ehizturiek, euren aldetik, ukatu egin dute beraiek direnik mozketaren egileak «zuhaitzak moztea gure teilatuaren kontra harriak botatzea» litzatekeela argudiatuz. Arazoa udaletxera eraman dute orain. Patxiku Irisarri alkateak adierazi digunez, «arazo handia» dute Udalean. Izan ere, jendeak ez badaki ere, «ordenantzarik ez dago Usategietan, baldintza plegua bakarrik dago, hortaz ez dugu eskumenik deus aplikatzeko». Arazoa airean dago eta, itxura guztien arabera, luzerako izanen da.
Kontuak kontu, Usategietako Igandea giro onean ospatu zen, eguraldi ederrarekin. Hala ere, bisitan etorritako kanpotarrak goibel zeuden, sareak hedatu ez zirenez, ez baitzuten aspaldiko ohitura ikusterik izan.
Arratsaldean, jende franko bildu zen plaza bazterrean eta antolatzaileak gustura agertu ziren egunak izandako erantzunarekin.
16 Patata tortilla
Usategietako Igandearen aitzakian, patata tortilla txapelketa egin zuten gazteek, aurten bosgarren urtez. 16 hirukotek hartu zuten parte bi mailetan sailkatuta. 16 urte bitartekoetan Beñat Maia, Aitor Danboriena eta Ibai Gallardonek irabazi zuten. Bigarren saria Beñat eta Nerea Iparragirrek eta Amaia Zelaietak osaturiko hirukoteak lortu zuen. Maila nagusian Egoitz Olagarai, Eneko Arangoa eta Asier Irazoki izan ziren txapeldunak. Bigarren saria Amaia Agirrek, Jabier Galarregik eta Olatz Ollok eskuratu zuten.
Zalaparta handia Usategietako egoera korapilatsuagatik
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.
Egin TTIPI-TTAPAren lagun