Euskal Herriko Lehen Mailako Arpana eta Txinga-eramate txapelketak erabaki ziren urriaren 3an Berriozarren (Nafarroa) eta aurtengoan Nafarroako kirolariek ez dute txapelik eskuratu.
Txinga eramaten, iaz txapeldun izandako Migel Angel Sukuntza leitzarra saiatu zen, baina azkenean hirugarren izan zen, Debako Juan Joxe Agirregabiria (Gipuzkoa) eta Laudioko Roman Hierroren (Araba) gibeletik.
Arpanean ere hirugarren postua
Euskal Herriko Lehen Mailako arpanlari txapelketaren finala ere jaialdi berean erabaki zen. Anaien arteko lehia estua eskaini zuten Aitor eta Igor Esnaola gipuzkoarrek eta Iñaki eta Josetxo Barberena ultzamarrek. Azkenean, bortz segunduko aldeaz Legorretakoak nagusitu ziren. Mikel Bertiz sunbildarrak eta Xabier Urrutia arraioztarrak osatu zuten podiuma. Eta seigarren postua Igor Lasaga beratarra eta Jabier Galarregi etxalartarrarentzat izan zen.
Harri ttikietan parekorik ez
Aimar Irigoien errezildarrak irabazi zuen harri ttikietako Euskadiko Harri-jasotze Txapelketa urriaren 4an Aizarnazabalen (Gipuzkoa), hirugarren urtez segidan. Gainera, txapelketako marka ezarri zuen, iaz baino 100 kilo gehiago bizkarreratuta. Joseba Ostolaza izan zen txapeldunordea bertze behin, zazpigarren aldiz sailkatu baita bigarren postuan. Izeta IV.a eta Izeta III.a sailkatu ziren gero, hurrenez hurren.
Hiru nafarrek bete dituzte azken postuak. Aipagarria izan zen, halere, Unai Bertiz sunbildarraren lana, Nafarroako txapelduna lehen aldiz aritu zen txapelketan eta marka ona ezarri zuen (10.950 kilo).
Josetxo Urrutia leitzarrak eta Aldatzeko Xabier Igoak, euren aldetik, ondu egin zituzten aurrez eurek ezarritako markak. Urrutiak 9.450 kilo altxatu zituen guzira eta kontuan hartu behar da bera zela harrijasotzailerik arinena.
Txinga eta arpanean hirugarren eskualdekoak
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.
Egin TTIPI-TTAPAren lagun