Etxarri Aranazko Floren Nazabal, Arantzako Donato Larretxea, Lezaungo Juan Jose Lopez, Ezkurrako Mikel Mindegia eta Olagueko Antonio Senosiainek hartuko dute parte azaroaren 13n Doneztebeko pilotalekuan jokatuko den Nafarroako lehen mailako aizkora txapelketan.
Urriaren 4an erabaki zen, orduan jokatu baitzen kanporaketa eta bortz aizkolari hauek lortu zituzten denborarik onenak, bi kanaerdiko, bi 60 ontzako, eta 72 ontzako bat mozten. Nazabalek 11:40 behar izan zituen; Larretxeak 12:36; Lopezek 13:31; Mindegiak 14:22 eta Senosiainek 15:14.
Barberena finaletik kanpo gelditu zen 12 segundugatik . Manuel Kañamares zazpigarren izan zen, Ander Erasun aurtiztarra zortzigarren eta Aitor Senoisain bederatzigarren. Hala, Senosiain II.ak eta kanporaketan parte hartu ez zuen eta erretiroa hartzea pentsatzen ari den Antonio Jaunarena zubietarrak maila galduko dute.
Euskal Herriko hirugarren mailako finala Goizuetan
Nafarroako Txapelketa Nagusiko finalistak ez ezik, Euskal Herriko hirugarren mailakoak ere erabakia dadaude. Anizen jokatu zen hirugarren eta azken kanporaketan Etxarri-Aranazko Juanjoxe Erdoziak eta Nuarbeko Josu Aizpuruk lortu zuten finalerako txartela.
Beraiekin batera, Berako Oihan Larretxea, Leitzako Arkaitz Olano, Mutrikuko Ugaitz Mugertza eta Urrozko Raul Kastro ariko dira Goizuetan, azaroaren 22an, 12:30ean jokatuko den finalean.