Inguruko bizilagunek bakarrik bildu ditzakete onddoak Bertizko Jaurerrian

«Inguruko bizilagunei soilik utziko zaie basoko produktuak biltzen, beti ere, etxeko kontsumorako». Halaxe dio Bertizko Jaurerri­ko araudiak. Horren arabera, Bertizaranako herritarrek (Oieregi, Narbarte eta Legasa), Etxalarkoek, Baztangoek, Sunbillakoek, Elgorriagakoek eta Doneztebekoek bakarrik dute Natur Parkean produktuak –tartean onddoak– biltzeko baimena.
Berria ez da oraingoa, joan den urteko ekainaren 17an onartu baitzuen Nafarroako Gobernuak, Foru Dekretu bidez, Bertizko Natur Parkea Zainketa Bereziko Eremu deklaratzea eta hura erabili eta kudeatzeko III. Plan Zuzentzailea egitea. Araudi orokorren 18. artikuluan ageri da aipatutako muga hori.
Iazko denboraldia onddo aunitzik atera gabe joan zenez ez zen arazorik sortu, baina aurten onddo dezente ateratzen ari da, eta jendeak sorpresan hartu du erabakia, batez ere, kanpotik etorritakoek. Basozainek Natur Parkera onddo bila joaten direnei nongoak diren galdetzeko eskubidea dute, horrela, onddoak edo bertze produktuak nork bildu ditzakeen ikusteko.