Urtero bezala, urriko hirugarren igandea egun berezia izanen da, usazaleek besta handia ospatuko baitute. Goizean goizetik, eguraldiak laguntzen badu, Iharmendiko magaletan jende parrasta elkartuko da. Ohitura den bezala, oinez eginen du jendeak Usategietarako bidea eta goiza han pasatu ondotik, arratsaldean herrira jautsiko da besta.
Aurten Detraka antzerki taldearen Zirkus Mirkus haurrentzako ikuskizuna izanen da 17:30ean plazan. Altxata Kultur Elkarteak postua paratuko du talo, janari eta edariekin, eta eguna akabatzeko dantzaldia izanen da Joselu Anaiak taldearekin.