Unai Telletxea eta Joseba Aldabek osatutako Igantziko Biltokiko infantil mailako pilotari bikoteak uda ederra egin du. Zangotzako txapelketan bikain ibili ziren eta zazpi partida bata bertzearen ondotik irabazita, txapel handia jantzi zuten. Txapelketa Leitzako Aurrerako Xabi eta Ibairi 18-12 irabaziz hasi zuten; Txaurtako Espelosin eta Azpirozi ere irabazi zieten, 18-3; Oberenako Zamora eta Andueza izan zituzten gero arerio, eta tantu bakarrean utzi zituzten; 4 tantutan utzi zituzten Irunberriko Carlos eta Ancin eta hutsean Ander eta Iker.
Finalerdian 18-11 irabazi zieten Oberenako Espinal eta Anduezari. Honela, irailaren 6ko finalerako txartela eskuratu zuten eta finalean, lehen jardunaldiko bikote bera izan zuten kontrario, Leitzako Xabi eta Ibai. Finalak ezberdinak izaten omen dira, baina igantziarrek finalean ere ez zuten hutsik egin eta 18-11 irabazi zieten leitzarrei.
Donostiako Aste Nagusian ere txapeldun
Donostiako Aste Nagusiko txapelketan ere Unai Telletxea eta Joseba Aldabek txapela jantzi zuten. Finalean 18-7 irabazi zieten Hernaniko Labaka eta Erasuni. Aipatzekoa da Unai Telletxeak Leitzako txapelketan ere jokatu duela, Ordiziako Iker Iribarriarekin bikote eginez. Finalean urduri aritu ziren eta tantu bakarragatik galdu zuten Agirre eta Iruretagoienaren kontra, 17-18.
Zangotzako eta Donostiako txapelak eskuratu dituzte
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.
Egin TTIPI-TTAPAren lagun