Pixkanaka berpizten ari da herriko besten abereen lehiaketa. Urte kaxkarrak ezagutu eta gero, gero eta laborari gehiagok ekartzen dituzte haien animaliak. Aurten denbora hezea izan bazen ere, 15 bat izan dira behiak eta ardiak plazaraino ekartzeko lana hartu dutenak. Kritika errexa da, baina herriko besten erdi erdian goizean 6:00etan iratzarri behar dute kabalak prestatu eta herrira eramateko.
Holsteinetan, Geroari ustiapena izan da nagusi (Janbatit Indart, Felix Irigoien, Beñat Azkarraga eta Andiazabal senar-emazteak). Sari nagusia irabazi du, baita errape politen saria ere. Sailez sail hiru sari eraman ditu, Tatien Mendiondek bertze hainbertze, Garateko Bordako Leizagoien aita-semeek bertze bat eta Leheteiko ustiapenak bertze bat.
Behi gorrietan Bortxaineko Beñat Zundak irabazi du sari nagusia bi urteko behi batekin. Etorkizun handiko behiaren saria, berriz, Anexeneko Bordako Pettan Errandonearentzat izan da. Sailez sail, lehia orekatua izan da. Errandoneak bi sari eraman ditu eta Agustin Gorozurretak eta Harriztegi aita-semeek bertze bina. Battit Laborde, Zunda, eta Elordiako Mizel Elissaldek sari bana eraman dute.
Zaldi eta ardietan txapelketak ez du hainbesteko arrakastarik izan, baina animali gutxi baziren ere batzuk aski ederrak ziren. Ardietan Hernain Bordako Panpi Berreauk irabazi ditu sariak bai bildotsenak baita helduenak ere. Zaldietan gauza bera gertatu da. Sari guziak Mikeltegiko Bordako Errandonea anaientzat izan dira.
Azienda lehiaketa berpizten ari da
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.
Egin TTIPI-TTAPAren lagun