Joan den irailaren 15ean egin zuten aurtengo bigarren subasta, sexta jaso zuen postu bakarraren gainean. Inork ez zuen prezioa hobetu eta 22. postua ateratako prezioan eraman zuten, 830 eurotan.
Aitzineko urteetan ez bezala, aurten 3. eta 4. sareak eta 16, 20 eta 21. postuak hutsik gelditu dira. Ez ditu inork hartu. Usategien historian lehenbiziko aldia da hainbertze postu hartu gabe gelditzen direna. Arrazoiak desberdinak dira, galdetzen diozunaren arabera. Ehizturiek «parajearen egoera txarra» aipatzen dute. «Udalak ez ditu hango zuhaitz-adarrak eta iratzeak garbitzen», kexu dira. Bertzalde, Patxiku Irisarri alkateak dioenez, «egiazko subasta kalean egiten dute ehizturiek, udaletxera joan aitzinetik». «Elkar hartzen dute eta horrela ez da pikerik izaten». Krisiak ere eragina izaten ahal duela aipatu du Irisarrik.
Udalak 34.775 euro jasotzea espero zuen postuak lehenbiziko aldiz enkantean atera zirenean. Baina ez da kopuru horretara ailegatu, bi sare eta hiru postu hutsik gelditu baitira. Guztira 27.295 euro jasoko ditu aurten Udalak. Joan den urtean 42.280 euro jaso zituen, 2007an 49.605 euro eta 2006an 52.333 euro. Urtetik urtera makurtzen ari da enkantearen saltsa. Ikusi beharko da nola akabatzen den afera hau.