Irailaren 28an Donostiara bisita eginen dute Arkupeak erretiratuen elkarteko kideek. Goizean Kursal berria bisitatuko dute eta tartean, hain famatuak diren Moneoren Kuboak ere ikusiko dituzte, baita artisautza dendak eta museo bakarren bat ere. Sarrera ordaindu beharreko lekuetan, bakoitzak berea ordaindu beharko du. Beranduago, eguraldi polita baldin bada, Igeldora joanen dira. 2etatik 2,30ak artean bazkaria izanen dute Ondarreta tenis jatetxean, Igeldoko funikularraren ondoan, honako menu honekin: Barazki menestra (potxak eskainiko dira), pikantoia guarnizioarekin, etxeko goxokiak txokolate beroarekin, kaba eta ohiko edariak. Arratsaldean dantzaldia izanen da Modestorekin, baina itzuli bat eman nahi duenak bertan izanen du Ondarretako hondartza. Bidaiaren prezio, autobusa, musika eta janaria barne, 3.500 pezetakoa da.