Irailaren 17an Samaniegon jokatutako kanporaketa saioan ez zen ustegabe handirik izan eta Donato Larretxea, Joxemari Olasagasti, Mikel Mindegia, Floren Nazabal, Migel Mari Peñagarikano eta Felix Etxeberriak eskuratu zuten finalean aritzeko txartela. Finala urriaren 29an jokatuko da Oionen, Araban.
Guzira hamar aizkolari aritu ziren finaleko sei lekuen bila. Lehenbiziko txandan, ustez aizkolari onenak lehiatu ziren: Larretxea, Olasagasti, Senosiain, Peñagarikano eta Mindegia. Sei enbor moztu behar zituzten eta Larretxea eta Olasagastiren arteko borroka gogorra izan zen. Azkenean, Donatok Igeldokoak baino segundu bat lehenago akautu zuen lana (16’41”). Mindegia izan zen hirugarren, irabazlearengatik 21 segundura eta Peñagarikano laugarren minutu eta 50 segundura. Senosiainek 19 minutu eta 12 segundu behar izan zituen lana akitzeko eta denbora hori izan zuten erreferentziatzat bigarren txandako aizkolariek. Nazabalek aisa irabazi zuen txanda hau, 17 minutu eta 30 segundutan. Felix Etxeberria sunbildarrak eta Fausto Mugerza mutrikuarrak lehia gogorra izan zuten Senosiainen denbora hobetzeko. Biek lortu zuten, baina Etxeberria izan zen azkarrago (18’51”), jokoan zegoen finaleko seigarren lekua bereganatuz.