* Jose Antonio Loiarte zubietarrak Nafarroako bigarren mailako aizkolarien txapela jantzi zuen irailaren 30ean Igantzin egindako saioan.
* Joanemaria etxeko semea, duela 38 urte jaio zen. Berandu hasi zen aizkora munduan, 27 urterekin. Udan Saralegitarrekin erakustaldietan ibiltzen da.
* Egurketari lanean aritzen da kamioiarekin mendian eta horrek ez dio entrenatzen aritzeko asti gehiegi uzten: «Badakizu, hor goizean lanera joan eta arratsa arte ez zara bueltatzen etxera. Denbora gutxi gelditzen da».
Jaun eta jabe izan da Jose Antonio Loiarte aizkolari zubietarra Nafarroako bigarren mailako txapelketan. Uharte-Iruñan egindako kanporaketan aisa gailendu zen eta bertze horrenbertze egin zuen Igantziko finalean. 15 minutu eta segundu bakarra behar izan zituen bi kanaerdiko, bi 60 ontzako eta 72 ontzako enbor bat mozteko, bigarren izan zen Etxarri-Aranazko Erdoziak baino minutu eta 46 segundu guttiago. Ziordiko Flores, Arostegiko Manuel Kañamares eta Patxi Larretxea aranztarrak osatu zuten finaleko boskotea. «Bigarren mailan nahiko aisa aritzen naiz, gero lehen mailan izaten dira kontuak, hori haundixkoa da neretzat. Tarteko bat beharko litzateke» dio umoretsu Loiartek. Izan ere, lehendik probatua du lehen maila, lau bat urtez aritu baitzen. Orain bi urte galdu zuen kategoria eta orain pozik dago, berriz ere berreskuratu duelako.
«Ongi prestatuz, maila mantentzen ahal dut»
Lehenbiziko maila ona dagoela uste du zubietarrak. «Mindegia, Larretxea eta puntako denak hor daude. Ongi banintzake bi edo hirurekin borroka pixko bat egiteko modua ikusten dut. Lehen ere mantendu nuen urte askoz kategoria… Urteak gora doazi, baina pixko bat preparatu eta zure gorputza ongi ikusiz gero, maila mantentzen ahal da, baina zaila izanen da». 40 urteak hurbil izanda ere, ez dirudi hori aizkoran txarra denik, aizkolarien adinak ikusirik. «Gaztedirik ez da ari aizkoran, kirol garestia da eta etorkizunik ez da ikusten. Diru pixko bat ikustekotan udako erakustaldietan aritu behar duzu. Gaurko gazteek ez dute horrenbeste sufritu nahi».
Denborarekin aizkorarako ezaugarriak aldatu egin zaizkio Loiarteri. «Lehen gehiago preparatzen nintzen eta lan luzeetan ongi manejatzen nintzen. Orain denbora gutxi dut entrenatzeko eta fisikoki puntua ez dut ongi hartzen. Igantzikoa bezalako lan motzetan hobe aritzen naiz».
Aizkolari gustokoena Mindegia du Loiartek: «Estiloz politena eta gaur egun puntan dagoena bera da. Teknika eta burua, denak dauzki. Latasa ere ezagutu nuen eta ona zen, baina Mindegiak 51 urterekin hor segitzen du, ez du akabailarikan». Dena den Euskal Herriko finalerako Olasagasti du faborito. «Beti bezala Olasagasti aurrean izango da. Mindegiak bere lana eginen du, baina ez dut uste irabazteko modua izango duenik, lehen zuen azken sprint hori falta zaio. Eta kontuz Larretxearekin! Udako erakustaldietan ikusi dut eta sasoia hartzen joan da».