Urriaren 29an antolatuko da Bortzirietan Nafarroako III. Trikitilari Eguna

Nafarroako trikitilari guziak elkartzeko aukera izanen dute urriaren 29an, igandean. Egun hortan ospatuko da Bortzirietan Nafa­rroa­ko III. Trikitilari eguna. Elkargunea Lesaka izanen bada ere Bortziriak osoan barrena zabalduko dira trikitilariak (Lesakan bertan, Etxalarren, Beran, Igantzin eta Arantzan).

Auspo soinuak Nafarroako bazterretan
Urte aunitz badira jadanik trikitixak bere zabalpenari Nafarroako hain­bat xokotan hasiera eman ziola. Ordutik izan dugu dantzatu eta ongi pasatzeko aukera musika-tresna honen bixitasunarekin eta alaita­sunarekin. Trikitixaren hazia sustraitu nahirik, txapelketak antolatzen hasi ziren. Lautan antolatu da Nafarroako Trikitixa txapelketa, baina bide hau baztertu eta Nafarroako Trikitilari Egunak hartu zion erreleboa: duela bi urte antolatu zen Barañainen Nafarroako I. Trikitilari eguna, eta iaz Sakanan bi­ga­rrena. Aurten, berriz, Bortzirietara ekarri da topagunea.
Egun hau Nafarroa­ko trikitixa eskola guziak elkartzen dituen eguna da; elkar ezagutzeko, ongi pasatzeko, ikasleek urtean zehar ikasitakoa karrikaratzeko... azken finean, gure inguruko bazterrak trikiti doinuz betetzeko.
Nafarroako III. Triki­ti­lari eguna Lesakan antolatzearen arrazoia ez da kasualitate hutsa. Izan ere, Bortzirietan aunitz dira trikitixa eta panderoa ikasten eta jotzen ari direnak. Hortxe ditugu horren adierazgarri, Lesakako, Etxa­lar­­ko, Arantzako eta Be­rako trikitixa eskolak, ehun ikasletik goiti biltzen dituztenak.

Egitarau zabala
Goizeko 10etan emanen zaio hasiera egun honi, Lesakako plazan. Bertan eginen zaie harrera talde guziei. On­do­tik, Lesaka Trikitixa Taldeko gurasoek prestatutako hamarretakoa emanen zaie bai trikitilari eta bai panderojoleei. 11tan trikitixa eskolak banatu egingo dira: autobusez, bakoitza Bortzirietako herri batera joanen da. Herrie­ta­ko xoko guziak alaitu ondotik 2ak aldean Le­sakan elkartuko dira berriz ere denak. Elka­rre­kin joanen dira frontoira bazkaltzera. Baz­karia irekia da, joan nahi du­ten guzientzat. Txar­te­lak salgai egonen dira 1.200 pezetatan haurrentzat eta 2.000 tan helduentzat. Bazkalon­do­tik, 4etan Bortzirieta­ko Bertso-eskolako hiru bertsolarik saioa eskainiko dute. 5etan trikitixa eskola bakoitzak bere saioa emanen du (bina kanta eskainiz) eta honen ondotik trikitilari guziak elkarrekin joanen dira frontoitik plazara «Santimamiña» eta «Maria Jesus» abesti ezagunak joz. Aipatze­koa da, sari sorpresa izanen duen zozketa egi­nen dela. Egunari aka­baila ona emateko ETZA­KIT taldearekin iza­­nen da dantzaldia arratseko 7,30etan, Plaza Zaharrean.
Kasik Nafarroa osoko trikitixa eskola guziak Bortzirietara joanen direla kontuan hartuz, guzira, trikitilarien eta panderojoleen artean, 300 pertsona inguru bilduko da Nafarroa­ko III. Trikitilari egun honetan.