Uztailaren 20an gure hirugarren alaba izan dugu. Haurra sortu aitzinetik egunkarietan irakurri nuen dirulaguntzen kontu hau, eta erabaki genuen eskaera egitea. Nik lanean eszedentzia eskatu behar nuen, bainan laguntzen berri izan nuenean hiru urtekoa eskatu nuen. 12 urtez enpresa berdinean aritu naiz eta beharbada horregatik eszedentzia eskatzen ahal dut, bainan gaur egun lan merkatua dagoen bezala ez da batere erraza eszedentzia lortzea.
Laguntza ematen badigute heldu diren hiru urte hauetan 55.000 pezeta kobratuko ditugu hilabetero Nafarroako Ongizate Institututik .
Argi dago ezin dela laguntza horietatik bizi, bainan ez da nere kasua, nik eszedentzia eskatu egin behar nuen dena dela. Diru horrekin ez dut hilabeteko janaria erosteko ere.
Bertzalde, ikaragarria da zenbat paper eskatzen dituzten 3 haur dituzula eta lanean ari zarela frogatzeko. Iparraldeko egoerarekin ezin da konparatu. Lehengusu bat dut Ainhoan, eta berak 5 seme-alaba ditu. Erraten duenez merezi du haurrak izatea, egitan ongi baitaude dirulaguntzak.