Nahiko asteburu mugitua (eta aldi berean euritsua) izan genuen urriaren hirugarrena. Hasiera batean, larunbaterako, Mairu antzerki talderaren obra ikusgai bagenuen ere, azken momentuan, bertan behera utzi zen. Ondorioz, gazteek triki-poteoa antolatu zuten, herriko trikitilariekin. Ondotik afarian, 82 lagun bildu ziren Anttonion. Igandean, berriz, euria zela eta, nahiko hutsik ikusi genuen goizaldean Usategietako gaina. Arratsaldez ordea, bai Baztango dantza taldearen saioak eta ondotik Alaitz eta Maiderren erromeriak jende mordoxka ekarri zuen plaza ingurura. Dantzaldiko deskantsuan egin zen zozketa. Hauek dira sarituak: 12 uso bizirik eta egurrezko orgatxoa pertsona berak eraman ditu, Jose Mari Irigoienek. Egurrezko lorontzia Mireia Martinezek eta egurrezko 2 aulkiak Asier Arburuak. Altxata Kultur Elkarteak balantze positiboa egin du egun honetaz; eguraldiak lagundu ez bazuen ere, eta espero baino jende gutxiago ibili arren, bildutako diru-kopurua bertze urteetan baino handiagoa da. Honela, Etxalarko dantza taldeak 200.000 pezetako diru-sarrera izanen du. Lerro hauen bitartez Altxatak eskerrak eman nahi dizkie laguntzen aritu ziren herritarrei.
Usategietako aparkelekua
Urrian hasi ziren Iarmendin aparkaleku berri bat egiten. Bada urte saila Mª Esther Berrueta (Usategietako etxekoandreak) herriarenak ziren lurren jabe zela. Hala ere, jabetza izateko baldintza batzuk bete behar izan zituen bere garaian: Txorilepora pasoa utzi, igandeko musikari baimena eman... Berriki, baldintza hauek kentzearen alde, aparkalekuko obren kargu eginen zela adostu zuen udalarekin. Azken honen baiezkoarekin burutu ditu 1.240 metro karratu dituen aparkalekuaren lanak. Honela, ehizi sasoian bai usazaleek eta bai bertaratutakoek izan ohi zuten arazoari bukaera eman zaio.