Nafarroako 680 kiloko sokatira txapelketa Domisaindu egunean jokatu zen Atarrabian, saio bakarrean. Lesakako Beti Gazte suertatu zen txapeldun, Areso eta Txantrearen aitzinetik, tiraldi guziak irabazi ondotik. Honako zortzikote hau aritu zen lesakarren izenean: Agortxeberriko Karmelo eta Jose Angel Mitxelena; Vicente Igarzabal, Oskar Telletxea igantziarra, Makatzeneko Igor eta Joxe Telletxea, Alejandro Sarobe eta Iñaki Igoa. Agustin Zubietak bete zuen entrenatzaile lana eta Joxe Antonio Mujika aritu zen botillero gisara.
Beti Gazte, Areso eta Txantrea 640 kiloko txapelketan murgilduak daude orain. Azaroaren 11n Sunbillan egindako lehen saioaren ondotik, azaroaren 19an Burlatan eta azaroaren 25ean Latasan eginen dituzte hurrengoak. Pisu ttikietan Imotzeko taldea gehituko zaie. 600 kilokoan hiru saio izanen dituzte: abenduaren 2an Txantrean, abenduaren 6an oraindik zehaztu gabeko herri batean eta abenduaren 8an Leitzako pilotalekuan. 560 kiloko txapelketa, azkenik, abenduaren 16an Arbizun jokatuko den saio bakarrean eginen da.
Mutilez gain, Sakana, Atarrabia-Txantrea, Imotz eta Burlatako neskak ere ari dira lehian, 480 eta 520 kilotan.