Azkaingo Altxa Lili, Berako Gure Txokoa, Etxalarko Altxata eta Sarako Gaztetxea elkarteek antolatuta Zirimolan kultur hamabortzaldia burutuko da azaroaren 21etik abenduaren 3ra. Joan den urtean «Etxeak eta bizitzak» gai izan zuten aztergai eta aurtengoan etxe barnerat sartu dira, «Familia, biziaren bidean» izan baita hautatutako gaia.
Lehenbiziko ekitaldia Saran gauzatuko da azaroaren 21ean, asteartearekin. Arratseko 8,30etatik aitzin Herriko Etxean «Lana eta familia» gaiari buruzko mahaingurua eginen da. Peio Iralur Euskal Laborarien Batasuneko kidea, Marta Agirrezabala Gipuzkoako EHNEko idazkaria, Jane Kreckelbergh «Emazteak diote» taldeko lehendakaria eta Eraikizaneko kidea, Maider Jauregiberri Familiaren Sindikatu Konfederazioko partaidea eta Esteban Olaizola Gipuzkoako Kofradien lehendakaria izanen dira solasean. Joxet Oxandabaratz izanen da solasaldiaren eramailea.
Azaroaren 23an, ortzegunarekin, arratseko 8,30etan Azkaingo Biltokin «Sexu mitoak apurtzen» mintzaldia eskainiko du Luis Elberdinek. Azaroaren 24an, ortziralarekin, rock kontzertuak izanen dira Berako Altzate karrikako ostatuetan. Arratseko 9etan Marakooja taldeak joko du Zizkan, 10etan Inguma taldeak Bidaxkan eta 11tan Selektah kolektiboak Puin.
Azaroaren 28an, asteartea, «Familia, afektibitatea eta komunikazioa» mintzaldia eskainiko dute Izargain elkarteko Teresa Belasko eta Luis Marko psikologoek Etxalarko Herriko Etxean, arratseko 8etatik aitzinera.
Azaroaren 30ean, ortzeguna, Berako Iamotenean «Gay eta lesbianak» mintzaldia eskainiko dute arratseko 8etatik aitzinera Raul López EHGAMeko kidearen, David Lantheaume lapurtarraren eta emazte baten lekukotasunarekin.
Zinea, bertso-kantu afaria eta antzerkia abendu hasieran
Abenduaren 1ean, ortzirala, arratseko 9etatik aitzinera, euskal zine eta bideo emanaldiekin zine arratsa osatuko da Etxalarko Herriko Etxean. Sartzeko 500 pezeta edo 20 libera ordaindu beharko da.
Abenduaren 2an, larunbatarekin, Sarako Lastiry jatetxean bertso kantu afaria izanen da arratseko 9etatik aitzinera. Hegoalde nahiz Iparraldeko kantari eta bertsulari gazteak izanen dira afarian: Amets Arzallus, Xumai Murua, Eneritz Zabaleta, Mirentxu Artetxe, Sustrai Kolina, Iñigo Olaetxea eta Estitxu Arozena. Afarirako txartelak 100 liberetan (2.500 pezeta) izanen dira salgai.
Zirimolan Kultur Hamabortzaldi hau akitzeko, abenduaren 3an, igandea, antzerkia izanen da arratsaldeko 4etatik aitzin Azkaineko kiroldegian. Hiru Punttu antzerki taldearen eskutik, «Hotel du fronton» Antton Lukuk idatzitako antzezlana ikusteko modua izanen da. Sartzea 30 libera (750 pezeta) ordainduko da.