* Onddo biltzaile amorratua izandua da Narziso, naiz eta orain gerriko minak hainbertze ibiltzen uzten ez dion. Hala ere erreleboa segurtatua du etxean.
* Ituren eta Zubietako mugan dagoen Pizarreneko bordakoa da sortzez. Azken urteotan, ordea, Eguzkialdean bizi da, Aurtitzen.
* Aurtengo udazkena arras ona izan omen da onddoetarako, Narzisok dioenez “euri ona egin duelakoz.”
* Ibiltzekotan pago eta haritzetan ibiltzea nahiago du, «pinuditan zuri xamarrak izaten dira onddoak, eta ez zaizkit gustatzen». Xixak ere ez ditu biltzen, ezagutu, ezagutzen dituen arren.
Zu betidanik fuerte ibili zara onddo biltzen. Noiztik heldu zaizu afizioa?
Neri mutil-koxkorra nintzenetikan. Gaztetan-eta aunitz ibili naiz, orain berriki arteraino. Orain gutti xamar ibiltzen naiz, zeren malda hoietan ibiliz gero gerritatik mina izaten dut gero. Halere xelaietan ibiltzen naiz oraindik.
Zeinek erakutsi zizun onddo biltzen?
Aitak erakutsi zidan. Ni baserrian sortua naiz eta han inguruan izaten ziren onddo aunitz.
Aurtengo udazkena aski ona izan omen da onddoetarako.
Bai, ni ez naiz ibili, bainan etxekoak bai. Jendeak onddo aunitz bildu du aurten Iturenen eta goiko mendi hoietan. Aurten euri ona egin du eta horregatik atera da onddoa.
Badakizu etxekoek zenbat kilo bildu dituzten?
Bueno, alabak lanean ari dira orain, bainan halere larunbat eta igandetan kilo saila bildu dute. Denen artean 20 edo 30 kilo bildu ditugu kongelatzeko.
Zuk zer nahiago duzu onddo biltzeko, pagadia, hariztia, pinudia…
Nik pagadia eta haritza, pinudian ez naiz ibiltzen. Zuri xamarrak izaten dira onddoak eta ez zaizkit gustatzen. Xixak ere ez ditut biltzen, ezagutzen ditut bainan onddoa nahiago dut. Batzuei xixa gustatzen zaiote eta nik, berriz, onddoa ikaragarri gustatzen zait.
Nola prestatzen duzu jateko?
Nik beti hutsikan jaten dut onddoa, tortilan ez zait hainbertze sartzen. Haragi puska bat baldin badu laguntzeko, ederki.
Zer behar da onddo-biltzaile ona izateko?
Ona izateko ibili egin behar da azkarki, badakizu, goiz xamar joan eta ibili… goizetan aisago harrapatzen da onddoa. Berandu joanez gero bertze zazpi-zortzi lagun ibili zaizkizu lehenagotik. Ni ibiltzen nintzenean argitu orduko joaten nintzen, argitu esperoan egoten nintzen goi horretan.
Zure ustez azken urteotan jende sobera ibilki da hemengo mendi hauetan onddo bila?
Aurten denentzat pixko bat atera da, bainan joan den urtean gutti atera baitzen… jendea pilaka etortzen da orain. Gipuzkoatik, Iparraldetik eta toki guzietatik etortzen da jendea orain, azkarki gainera. n