Ohitura zahar bati jarraikiz, Euskal Herriko uso ihiztarien elgarretaratzea ospatuko da aurten ere. Denetan 9 sare toki badira: 7 Ipar Euskal Herrian, bat Biarnoko Lanne herrian (Xiberuako mugan) eta azkena Etxalarren. Urte guziz Euskal Herriko uso ihiztariak biltzen dira, herri desberdin batean aldizka, ordre alfabetikoa segituz. Gan den urtean 120 presuna Baxe Nafarroako Lekunberrin bildu baziren, aurten Sarako aldi izanen da. Larunbat huntan, abenduaren 2an, elgarretaratuko dira. Goizean herriko usotegietan zer aldaketa izan diren ikusteko bisita egin eta, aperitifa han berean hartuko dute. Gero Omordia gelan bazkalduko dute, usaiazko uso kondaketa eginen dutelarik. Agian bertzeetan Saran baino gehiago atxeman dituzte, bertzenaz pentsatzekoa da zenbaketa uste baino fiteago egina izanen dela!