Nafarroako Gobernuko Ingurumen, Lurralde Antolaketa eta Etxebizitza Departamenduak Bidasoa-Berroarango Junta barnean dagoen Zumaleku inguruan oihanberritze proiektua onartu du. Lanen aurrekontua 12,94 milioi pezetakoa da eta Gestión Ambiental Viveros y Repoblaciones de Navarra, S.A. elkarte publikoak eginen ditu.
Lanak 15,25 Hektareatan eginen dira eta lehen helburua, Zumaleku inguru horretako oihan naturala berreskuratzea izanen da. Horretarako, kontserbazioan eta babesean oinarritu da proiektua, baina produkzioa ere alde batera utzi gabe. Espezierik egokienak landatuko dira eta zuhaiztien garapena ahalik eta egokiena izan dadin baldintza egokienak jarriko dira, kalitatezko egurraren produkzioa handitzen den bitartean. Landatu behar den inguru osoa itxiko da, aziendarik ez sartzeko eta landatutako zuhaitzen garapena segurtatzeko.
Guzira 24.739 zuhaitz sartuko dira: 11.277 larizio pinu, 5.955 haritz, 2.893 haritz zuri, 818 lizar, 818 platano, 720 ezki, 720 urki eta 720 mendiko zumar. Orain haritz, gaztain, pago eta urki zuhaitz bakan batzuk eta sasia bertzerik ez dago inguru horretan.