* Abenduaren 5ean Boluntariadoaren Nazioarteko Eguna izanen da mundu osoan, eta Baztango Bidelagun taldeak ere besta herrikoi bat eginen du hori ospatu eta jendea kontzientziatzen segitzeko.
* Gaur egun 38 boluntario ari dira Baztango xahar eta eriei beren laguntza eskaintzen, bainan beharrak handiak direnez boluntario gehiago behar omen dituzte.
* Boluntarioak etxekoandreak eta jubilatuak dira batez ere, bainan gazte bakar batzuk ere ari direla erran digute Isidro eta Aliziak.
* Luzera bertze herrietan proiektu hau ezagutzera eman eta taldea bertze eskualdeetara zabaltzeko asmoa erakutsi dute
Bada urte bat Bidelagun sortu zela. Zer balorazio egiten duzue?
Alizia: Arras gustora aritu gara. Ikusten duzu xaharrek beren irri hoberenarekin hartzen datzutela, beti izaten dute zerbait kontatzeko, eta aunitz eskertzen dute elkarrizketa ttiki bat. Sentitzen duzu hortara denbora bat dedikatzeak egiazki merezi duela. Nik animatuko nuke jendea apuntatzera.
Zein da zehazki egiten duzun lana?
A: Ni zahar-etxera gaten naiz, bainan badira etxe partikularretara gaten direnak ere, eta baita Iruñean hospitalean dauden xaharrekin egoten direnak ere.
Gaixotasun psikikoak dituzten eriekin ere egoten zarete, ezta?
I: Bai, Benitomendi zentrora gaten diren sei boluntario ditugu. Esperientzia diferentea da, han bertze eritasun batekin daudelakoz. Handik 19 eskaera daude, eta 7 bakarrik beteak. Hor hutsune handia dago eta boluntarioak behar ditugu betetzeko.
Bertzalde, urte honetan lau traslado egin ditugu. Guk ez dugu edozein trasladatzen, behar gorrian daudenak bakarrik. Izan ere, lehenbizi gizarteak ematen dituen laguntzak daude, eta soilik hondarrean, ez dutelarik inor, orduan sartzen gara gu. Ez diogu inori lanik kentzen.
Zerbitzu ofizialak mantsoegiak dira?
Zenbaitetan bai. Eskaera egin eta laguntza ailegatzen denerako beharbada bi hilabete pasatu dira. Tartean pertsona hori gehiago eritu edo hil ere egin daiteke.
Laguntzen dituzuenak ongi sentitzea da zuen sari bakarra orduan.
A: Bai, ez da bertzerik. Azkenean astean bi ordu zuretako ez da deus, eta berendako aunitz da, behar hori sentitzen dutelako.
I: Denbora urrea dela erraten da, bainan urre horrek balioa du ematen duzularik. Aunitz alditan, zenbat ordu pasatzen dugu telebistaren aitzinean? Guk ordu bat, edo bi ordu eskatzen dugu astean. Ez duzu zure bizia aldatu behar hemen hasteko.
Zer egin behar du boluntario izateko gogoa duenak?
A: Edozein boluntariorengana jotzea aski da. Boluntario izateko gogoa izan behar da bakarrik. Hau ez da lana, solas egin, paseietan ateratzea, jostatzea…
I: Benitomendira gaten direnak kontatzen dute nola han egoten diren zure esperoan, ongi jantzirik, nerbiosturik… aunitzek urte osoa pasatzen dute han sarturik. Beraz, guretzat ttikikeria bat dena beraientzat bizia da.