Nafarroako Gobernuak, Kultura eta Turismo Departamentuaren bidez, 2.110.087,88 euro bideratuko ditu, 2008-2011 aldian turismo-produktuak garatzeko inbertsioak egiten dituzten toki entitateei eta turismo-partzuergoei zuzendutako laguntzen deialdian. Bertzalde, Nafarroako Turismoak 348.923,80 euroko diru-laguntzak emanen dizkie “Nafarroako Mendia” Helmugako kalitate-planaren barruan aurkeztutako sei proiekturi. Proiektu horiek Cederna-Garalur Elkarteak kudeatzen ditu aurten.
Aterpetxea Goizuetako Zubi-Muxun
Toki entitateei eta partzuergoei 2008-2011 aldian turismo-produktuak garatzeko emandako laguntzen barrenean, dirulaguntza jasoko duten sei proiektuen artean bakarra da eskualdekoa, “Aterpetxea Goizuetako Zubi-Muxu eraikinean”. Goizuetako Udalak 414.704,76 euro jasoko ditu.
Urdazubiko lezeak eta Leitzalarrea
“Nafarroako Mendia” Helmugako kalitate-planaren barrenean laguntza jaso duten proiektuen artean, Urdazubiko lezeetan bisitariak hartu, informatu eta artatzeko espazio berriak 77.874,04 euro jasoko ditu eta Urdazubiko Ikaburua lezean sonorizazio-lanak egitea, turismo-gunearen babesa indartzea eta garapen iraunkorra eta energia-aurrezkia sustatzeko proiektuak 62.755,53 euro, biak Urdazubiko Udalak bultzatuta. Leitzako Udalak, berriz, 77.618,05 euro jasoko ditu Leitzarrea inguruko ondareari buruzko prestakuntza eta interpretazioa eta balioa emateko plana egiteko.